“To ïaineh ha nga, bad ngan ïaineh ha phi. Ka tnat kam lah ban seisoh da lade hi; ka lah ban seisoh tang lada ka ïaineh ha u dieng sohwaiñ. Ha kajuh ka rukom, phi ruh phim lah ban seisoh lymda phi ïaineh ha nga. Nga long u dieng sohwaiñ, bad phi long ki tnat. Uno uno uba ïaineh ha nga, bad ma nga ha u, un seisoh shibun; naba phim lah ban leh ei ei khlem ma nga.”
ÏOANNIS 15:4‭-‬5 (CL VERSION)

U tnat ba lah dkut noh na u dieng u im tang shi por. U lah ban mih sla lane ban iap slem hynrei um lah satia ban seisoh.

Ngi lah ban sngew teng teng kumba ngi lah beit khlem U Blei katba ngi dang sngew sting ka jingkit .Haba ngi biang nadong shadong, ngi don ka jaka thiah bad dem, ngi don ka bam, ka kam ka jam, ka kup ka sem balei ngin shu donkam ia U Blei? Lehse phi pyrkhat kumta. Teng teng ngi dang sngew lah ban kit hi iaki jingiashem jong ngi. Ngi wad bun ki lad ki lynti, lait na U Blei hynrei ngi shem pat ba ym don lad lait na U Blei. Baroh ki lad ban lait ngi lah ban shem, hynrei ki neh tang shi por.
Ki sla ki lah ban jyrngam, u tnat,ka jingim jong ngi u lah ban im hynrei un sa tyrkhong pat khlem da ioh hi iaki um jong u diengbah uba long U Jisu.

Ka ktien U Blei ka ong ha ngi ba ngim lah ban leh eiei khlem ma U. Ba ngin sei iaki soh ngi donkam ia U Jisu. U long U dieng soh waiñ uba shisha Uba lyngba jong U, ngi lah ban sei iaki soh waiñ kiba bang ha ka jingim jong ngi, ha ki kam ki jam, ki jingpule, ki jingiadei para briew bad ha ki jingiashem ba shimet ha jingim jong ngi.

U Jisu U la ong ruh ba haba ngi iaineh mangi ha U, ma U ruh Un iaineh ha ngi. U long U ba iaineh da shisha. U khot iangi sha U ym ban khang iangi na ki jingbha baroh hynrei ba ngin ioh mad iaka jingbha baroh haba ngi iaineh ha U bad ba ngin sei iaki soh kiba thiang tam, ba kane ka pyrthei kan ym lah satia ban ai lano lano ruh.

Lada phi lah iaid jngai na U Jisu, to wan bad aiti noh ialade ha U. Wat nym shah pynthame ha ki lynti ka pyrthei kaba ong iangi ba don ka lynti ba kham bha lait na U Jisu.To ngin iaineh ha U naba tang ma U hi Uba long U diengsoh ba shisha U ban ai bor iangi ki tnat ba ngin sei iaki soh ba im bad ba bha.

Kita ki soh, ki dei ki jingpynshisha (Evidences) jong ka Jingngeit jong ngi ha U Jisu Khrist.

Ka Burom Ka Long Sha U Blei. AMEN

— by Daehunmika Langstang

— BAN SAN HA U —

By Daehun Langstang

“Ia ka jingsuk nga iehnoh ha phi, ia ka jingsuk ka jong nga nga ai ha phi, ym kumba kata ka pyrthei ka ai, nga ai ma nga ha phi. Wat khih khuslai na ka dohnud jong phi, lymne wat sheptieng.”
-Ioannis 14:27

U Blei jong ngi Um long U Blei ba wanrah jingsniew, ba wanrah jingkulmar ha ka jingim jong ngi hynrei U long uba wanrah jingsuk.U Jisu U kular iangi ka jingsuk kaba kynja Blei kaba ym lah ban ianujor bad ka jingsuk ba kane ka pyrthei ka ai kaba neh tang shi por. Ka jingsuk kaba ngi ioh na ki jingsngewbha pyrthei ki long kiba lyngkot hynrei ka jingsuk Blei ka long kaba neh bymjukut haba ngi iaid ha u slap lane ka lyer.

Te mynta haba ngi tip iakane, ngi tip ba ngi lah ban shem ia ka jingsuk hapdeng ka jingialeh lyngba jong U Jisu. Ngi tip shano ngi lah ban phai ban ioh jingsuk ha ka jingim jong ngi ka bym blad noh .Bad ngi tip ba haba ngi pan na U ngi ioh ban pdiang iaka.

Namar U Blei jong ngi U long uba dap da ka jingaiei bad Um ju leh bym suid niew ia kiba wan bad kyrpad sha U.

U Blei Un Kyrkhu ia phi baroh kiba pule iakane. Amen

JINGPULE:-
“Ha kaba wai noh, ko parabangeit jong nga, to phin kmen ha U Trai. Ngam sngew ei ei ban ïai ban biang ïa kaei kaba nga la thoh mynshuwa, bad kan kham pynskhem ïa phi lada nga leh kumta.”
PHILIPPI 3:1 (CL)

Ngi iohi u Paul u thoh hangne, “TO PHIN KMEN HA U TRAI”.

Kumno phin kmen ha U Trai lada phim tip eiei shaphang U Trai? Kumno phin kmen ha U Trai lada phim iohi eiei shaphang U Trai kaba pynlong ia phi ban lehkmen ha U Trai?

Kata ka dei ka KAM JONG U MYNSIEM BAKHUID.Ïa U Mynsiem Bakhuid la ai katkum na ka Gospel u IOANNIS 16:14, ban pyndonburom ia U Jisu Khrist, kaba mut U Mynsiem Bakhuid U pynplie iaki khmat ka dohnud jong nga jong phi ban iohi iaka jingbhabriew bad ka jingitynnat U Jisu Khrist.

Haba nga iohi ia U Jisu Khrist hakiei kiei Baroh ba U leh, bad haka jinglong jong U baroh, dei hangta ba ka dohnud jong nga ka khring sha ka jingkmen ha U.

U Mynsiem Bakhuid u kitkhlieh bad seisoh ia une u soh dakaba pynlong ia nga bad phi ban iohi iaka jingbhabriew bad jingitynnat U Jisu Khrist.Namar kane ka JINGKMEN kaba u Paul u kren ka dei kaba pynmih da U Mynsiem Bakhuid namar nga bad phi ngim lah ban pynmih, BALEI? NAMAR KA JINGKMEN KA DEI KAWEI NAKI SOH JONG U MYNSIEM BAKHUID (Galatia 5:22-23) bad dei hangta haba U Mynsiem Bakhuid U don hapoh jong ngi Un pynmih iaka JINGKMEN.

Ngan pynkut dakine ki kyntien; “U MYNSIEM BAKHUID U AI IA NGA BAD PHI IA KI KHMAT BA NGIN IOHI IAKA JINGBHABRIEW BAD JINGITYNNAT U JISU KHRIST KABA KYRSOI BAD PYNMIH IAKA JINGKMEN NAPOH JONG NGA BAD PHI”

BAN SAN HA U
Website: bansanhau.code.blog

U Blei Un kyrkhu ia phi baroh kiba pule iakane… Ka Burom ka long ia U Blei Amen